Bhale dinoñ kī baat hai- Ahmad Faraz

bhale dinoñ kī baat hai

bhalī sī ek shakl thī

na ye ki husn-e-tām ho

na dekhne meñ aam sī

na ye ki vo chale to kahkashāñ sī rahguzar lage

magar vo saath ho to phir bhalā bhalā safar lage

koī bhī rut ho us kī chhab

fazā kā rañg-rūp thī

vo garmiyoñ kī chhāñv thī

vo sardiyoñ kī dhuup thī

na iḳhtilāt meñ vo rum

ki bad-maza hoñ ḳhvāhisheñ

na is qadar supurdagī

ki zach kareñ navāzisheñ

na āshiqī junūn kī

ki zindagī azaab ho

na is qadar kaThor-pan

ki dostī ḳharāb ho

so ek roz kyā huā

vafā pe bahs chhiḌ ga.ī

maiñ ishq ko amar kahūñ

vo merī zid se chiḌ ga.ī

maiñ ishq kā asiir thā

vo ishq ko qafas kahe

ki umr bhar ke saath ko

vo bad-tar-az-havas kahe

Aur uska kehna tha..

maiñ koī panting nahīñ

ki ik frame meñ rahūñ

vahī jo man kā miit ho

usī ke prem meñ rahūñ

tumhārī soch jo bhī ho

maiñ us mizāj kī nahīñ

mujhe vafā se bair hai

ye baat aaj kī nahīñ

so apnā apnā rāsta

hañsī-ḳhushī badal diyā

vo apnī raah chal paḌī

maiñ apnī raah chal diyā

bhalī sī ek shakl thī

bhalī sī us kī dostī

ab us kī yaad raat din

nahīñ, magar kabhī kabhī

- Ahmad Faraz